Патӑрьел районӗнчи поликлиникӑра юсав ӗҫӗсем пыраҫҫӗ. Анчах, ЧР Сывлӑх сыхлавӗн министерстви пӗлтернӗ тӑрӑх, питӗ вӑрах.
Юсав ӗҫӗсене ҫуркунне вӗҫӗнче пуҫӑннӑ. Поликлиникӑна раштав уйӑхӗн 30-мӗшӗччен ҫӗнетсе пӗтермелле. Кун валли 39,9 миллион тенкӗ уйӑрнӑ.
Сывлӑх сыхлавӗн министрӗ Владимир Степанов ӗҫсене часрах вӗҫлеме, ҫитменлӗхсене пӗтерме хушнӑ. Ҫывӑх вӑхӑтра ҫӗнетнӗ поликлиникӑна йышӑнас процедура пуҫланмалла.
Хальлӗхе вара тухтӑрсем пациентсене ача ҫуратмалли уйрӑмра йышӑнаҫҫӗ.
Иртнӗ эрнере хореографи ӑсталӑхӗн «Ташӑ эрешӗсем» республикӑри пӗрремӗш фестиваль-конкурсӗ иртнӗ. Пултарулӑх ӑмӑртӑвне Куславкка районӗнчи Тӗрлемесри культура ҫуртӗнче пуҫтарӑннӑ.
Аса илтерер: хореографи конкурсне «Куславккасем» ентешлӗх тата Куславкка районӗн администрацийӗ Людмила Нянина тата Владимир Милютин балетмейстерсен ячӗпе ирттерме йышӑннӑ. Пултаруллӑ хореографсем ҫав тӑрӑхран тухнӑ.
Конкурса Чӑваш Енри Куславкка, Патӑрьел, Комсомольски, Ҫӗрпӳ, Сӗнтӗрвӑрри, Шупашкар районӗсенчи, Ҫӗнӗ Шупашкарти тата Мари Элти Чикмери 9 коллектив 203 ташӑҫӑпа пырса ҫитнӗ.
Гран-прие Шупашкарти Тӗп культура тытӑмӗн «Сарпике» халӑх ташӑ ансамблӗ тата Шупашкар районӗнчи Тутаркассинчи «Белара» халӑх ташӑ ушкӑнӗ тивӗҫнӗ.
Патӑрьелти ачасемпе спорт шкулӗн директорне 120 пин тенкӗлӗх штрафлама йышӑннӑ.
Следстви тата суд палӑртнӑ тӑрӑх, 2020 ҫулхи пуш-ака уйӑхӗсенче хӑйӗн машинине служба транспорчӗ валли уйӑрнӑ бензина янӑ. Ҫапла вӑл 425 литр бензин тӑкакланӑ. Патӑрьел районӗн администрацине пӗтӗмпе 17,5 пин тенкӗлӗх. Ҫав ҫулах кӗркунне директор ӑмӑртӑва хутшӑнакансене апатлантарма укҫа кирлӗ тесе ӗҫтешне каланӑ. Документсене хӑех хатӗрленӗ, алӑ пуснӑ - лешсем укҫа илнӗ имӗш. Чӑннипе вара илмен. Директор укҫана хӑйӗн тӗллевӗпе усӑ курнӑ.
Чӑваш Енӗн Элтеперӗ Олег Николаев паян республикӑри темиҫе ҫынна патшалӑх наградисемпе чыслама йышӑннӑ.
«Чӑваш Республики умӗнчи тава тивӗҫлӗ ӗҫсемшӗн» орден медалӗпе Чӑваш Республикин Вӗренӳ институчӗн ректорне, филологи наукисен докторне, доцента, Юрий Исаева, хавхалантарнӑ.
Юрий Исаев 1969 ҫулхи нарӑс уйӑхӗн 13-мӗшӗнче Патӑрьел районӗнчи Нӑрваш Шӑхаль ялӗнче ҫуралнӑ. 2010 ҫулхи ҫӗртме уйӑхӗнчен тытӑнса 2016 ҫулхи авӑн уйӑхӗччен вӑл Чӑваш патшалӑх гуманитари ӑслӑлӑхсен институчӗн директорӗнче тӑрӑшнӑ, 2016 ҫулхи авӑн уйӑхӗнчен пуҫласа 2018 ҫулхи кӑрлач уйӑхӗччен респубикӑн вӗренӳ тата ҫамрӑксен политикин министрӗ пулнӑ.
Патӑрьел районӗнчи Шӑнкӑртам ялӗнчи 2,5 ҫухрӑм ҫула ҫӗнӗ асфальт сарнӑ. Ку ӗҫе 145 миллион тенкӗпе пурнӑҫланӑ.
Ӗҫе "Дорстар" подрядчик пурнӑҫланӑ.
Подрядчик ӗҫе чылай маларах вӗҫленӗ. Ҫула 3 уйӑхрах сарса пӗтернӗ.
Шӑнкӑртамсем "Ял территорийӗсен комплекслӑ аталанӑвӗ" программӑпа килӗшӳллӗн ҫӗнӗ асфальтлӑ пулнӑ.
РФ Шалти ӗҫсен министерствин Патӑрьелӗнчи пайне юпа уйӑхӗн 10-мӗшӗнченпе ҫӗнӗ ҫын ертсе пыма тытӑннӑ. Вӑл — полицин подполковникӗ Андрей Ларьков.
Асӑннӑ пай Патӑрьел тата Шӑмӑршӑ районӗсенчи йӗркелӗхе тытса тӑрассишӗн яваплӑ.
Андрей Ларьков 1978 ҫулта Улатӑр хулинче ҫуралнӑ. Ҫемьеллӗ, 2 ывӑл ашшӗ. Юридици пӗлӗвне РФ ШӖМӗн Чулхулари академийӗн Шупашкарти филиалӗнче илнӗ. Чи малтанах вӑл Улатӑрти шалти ӗҫсен пайӗнче оперуполномоченнӑй пулса ӗҫленӗ. Унтан картлашка хыҫҫӑн картлашка тӑрӑх хӑпарса пынӑ май 2021 ҫулхи раштав уйӑхӗнче Патӑрьелӗнчи шалти ӗҫсен пайӗн пуҫлӑхӗн заместителӗ пулса тимлеме тытӑннӑ.
Канмалли кунсенче, юпа уйӑхӗн 8-9-мӗшӗсенче, Патӑрьел районӗнчи Шӑнкӑртам ялӗнче туй пулнӑ. Хӑнасем питӗ хавасланнӑ, ҫул ҫинче шоу тунӑ.
Машинӑсем ял тӑрӑх хытӑ янӑ юрӑ-кӗвӗпе вӗҫсе пынӑ, ҫул-йӗр правилисене пӑснӑ. Хӑнасем машина чӳречисенчен пуҫне кӑларса мӗн пулса иртнине телефон ҫине ӳкернӗ.
Ҫак видео ШӖМ ӗҫченӗсен куҫӗ тӗлне лекнӗ. Халӗ йӗрке хуралҫисем тӗрӗслев ирттереҫҫӗ.
Комсомольскинчи полици уйрӑмне М-12 ҫула тунӑ ҫӗртен 30 тимӗр бетон ҫухални пирки пӗлтернӗ. Подрядчике кӳнӗ тӑкак 350 пин тенкӗпе танлашнӑ.
Вӑрӑсен йӗрне часах тупнӑ. Вӗсем - Тутарстанри 28-35 ҫулсенчи тӑватӑ рабочи. Вӑрланӑ бетонсен пӗр пайне Патӑрьел районӗнчи пӗр ялта тупнӑ.
Арҫынсен тӗлӗшпе пуҫиле ӗҫ пуҫарнӑ. Следстви пынӑ вӑхӑтра вӗсен ытти ҫӗре тухса ҫӳреме юрамӗ.
Ӗнер, авӑн уйӑхӗн 21-мӗшӗнче, ирхи 6 сехетре Патӑрьел районӗнчи Пӑлакассинче сысна комплексӗнче выльӑх-чӗрлӗх усрамалли ангар ҫунма тытӑннӑ. Юрать-ха, пушарнӑйсем ҫулӑма хӑвӑртах сӳнтернӗ. Пушар тухсан ангартан 50 сысна ҫурине эвакуациленӗ.
Сӑмах май, юлашки талӑкра республикӑра виҫӗ пушар пулнине палӑртнӑ. Елчӗк районӗнчи Курнавӑшра 67 ҫулти арҫыннӑн хуралтисем ҫунма пуҫланӑ.
Чӑваш Республикин культурӑн тава тивӗҫлӗ ӗҫченне Эдуард Бахмисова 2022 ҫулшӑн Халӑхсем хушшинчи Ҫеҫпӗл Мишши премине пама йышӑннӑ. Аса илтерер, фонд ертӳҫи — Чӑваш халӑх поэчӗ Валери Туркай.
Эдуард Константиновича Ҫеҫпӗл Мишши премине пама йышӑннин сӑлтавӗ — «чӑваш халӑхӗн авалхи йӑли-йӗркине упраса хӑварассишӗн ӗҫлени, Тутарстанри Сиктӗрме ялӗн сӑн-сӑпатне тӗпрен ҫӗнетсе илемлетес ӗҫе уйрӑмах пысӑк тӳпе хывни».
Эдуард Бахмисов 1949 ҫулхи кӑрлач уйӑхӗн 10-мӗшӗнче Патӑрьел районӗнчи Тури Чакӑ ялӗнче ҫуралнӑ. Хусанти пединститутра пӗлӳ илнӗ. Пӗр вӑхӑт Тутарстанри шкулсенче ачасене географи вӗрентнӗ.
1990 ҫулта ӑна К.В. Иванов ячӗллӗ Чӑваш академи драма театрӗн директорӗ пулма йыхравланӑ, 1994 ҫулта Чӑваш наци музейӗн директорӗнче ӗҫлеме тытӑннӑ. Эдуард Бахмисов Шупашкарти Сӑра музейне тата Кӳкеҫри «Бичурин тата хальхи самана» музейсене уҫассипе нумай ӗҫленӗ, Чӑваш патшалӑх гуманитари ӑслӑлӑхсен институтӗнче директор ҫумӗ пулса тӑрӑшнӑ.
Шупашкарта ҫывӑх вӑхӑтра (23.05.2025 21:00) уяр ҫанталӑк, атмосфера пусӑмӗ 756 - 758 мм, 13 - 15 градус ӑшӑ пулӗ, ҫил 0-2 м/ҫ хӑвӑртлӑхпа ҫурҫӗр-хӗвелтухӑҫ енчен вӗрӗ.
| Бичурин Никита Яковлевич, монголовед, синолог, прозаик, очеркист, сӑвӑҫ вилнӗ. | ||
| Филиппова Лидия Ивановна, чӑваш сӑвӑҫи ҫуралнӑ. | ||
![]() | Пулӑм хуш... |